એક પાર્ટીના મોટા નેતા ગુજરાતનો પ્રચાર પતાવીને દિલ્લી ગયા બાદ સતારૂઢ પાર્ટીના પ્રચાર માટે તેમના અનુયાયી મુકતા ગયા હોય એવું લાગે છે. કપિલ શર્માનો શો પત્યા પછી અને ફિરંગી જેવા મુવી પણ ફ્લોપ ગયા પછી લોકો ને હસાવાની સમગ્ર જવાબદારી એક જવાબદાર વિપક્ષ તરીકે એ પક્ષે જ સંભાળી હોય એવું લાગે છે. ગુજરાતમાં વિપક્ષના ભાવી ઉપમુખ્યમંત્રીએ પહેલી ધારના તેમના જ્ઞાન પ્રદર્શન બાદ હવે મશરૂમ અંગે તદ્દન નવું જ ‘વિજ્ઞાન’ લઈને આવ્યા છે .
તેમના તાજેતરના ઉદભવેલા જ્ઞાન મુજબ ભારતના માનનીય વડાપ્રધાન તાઈવાનથી મશરૂમને મંગાવીને ખાય છે અને તેમના એક મશરૂમની કિંમત 80,000/- અંકે એસી હજાર પુરા છે અને સદરહુ મશરૂમને ખાવાથી વડાપ્રધાન ગોરા થઇ જાય છે જ્યારે ભવિષ્યનાં ઉપમુખ્યમંત્રી કાળા રહી જાય છે કેમકે તેઓ આવા મોંઘા ભાવના મશરૂમ ખાતા નથી. એ વાત અલગ છે કે તેમનું ધ્યાન ખાવા કરતા વધારે પાણી પીવામાં હોય છે .
તો ગઈકાલે બહાર પડેલા આ ખાસ સંશોધન બાદ અમે ફક્ત તમારા માટે જ લઈને આવ્યા છીએ મશરૂમ ખાવાના ફાયદા! તાઈવાનના આ ચમત્કારિક મશરૂમ ખાવાથી તમારે રૂમ ની જરૂર પડતી નથી કેમકે મશરૂમમાં જ રૂમ સમાયેલો છે અને એમ થવાથી તમારો ખાનગી વિડીયો બનાવાનો ખતરો પણ ઓછો રહે છે. તેમ છતાં પણ તમારો વિડીયો બને તો મશરૂમ ખાધેલું હોય તો તમે એટલા ગોરા થઇ જાઓ છો કે વિડીયો માં કોઈ દિવસ અંધારૂ થતું નથી. મોટા ભાગ ની બિલાડીઓ પણ સફેદ હોય છે એ તમે સ્ટુઅર્ટ લિટલ મુવી જોયું હશે એમાં બિલાડી કેવી સફેદ બતાઈ હોય છે? કેમકે મશરૂમ ને ગુજરાતીમાં ‘બિલાડીનો ટોપ’ પણ કહે છે.
તમને ગમશે: ગ્રેટ પીરામીડ ઓફ ગીઝામાં પુરાતત્વવિદોને મળી મોટી સફળતા
ઘણા લોકો ઓર્ગેનિક કલર માં માનતા હોય છે તો દિવાલ ઉપર ચૂનો ચોપડવાની જગ્યાએ આવા ઈમ્પોર્ટેડ તાઈવાન થી આવેલા મશરૂમ લગાવાથી દીવાલો પણ બોલી ઉઠે છે કે “ઔર કિતના સફેદ કરોગે? બસ કર બચ્ચે કી જાન લેગા ક્યા?” રાત્રે થતા ઘણા અકસ્માતો પાછળનું કારણ અંધારૂ હોય છે પણ જો મશરૂમ ખાઈ ને તમે રાત્રે ફરવા નીકળો તો તમે એટલા ઉજળા દેખાઓ છો કે તમારા કારણે વાહનો ની લાઈટો અંજાઈ જાય છે. ફેયર એન્ડ લવલી ક્રીમવાળા પણ પોતાની ટ્યુબ વેચવાની જગ્યાએ ધંધો બંધ કરીને ભાવી ઉપ મુખ્યમંત્રી એ જાણાવેલા મશરૂમ ની ખેતી કરવા લાગી જવાના છે. આ મશરૂમ ખાવાથી તમે એટલા ઉજળા થઇ જાઓ છો કે ઘણી વખત સૂર્ય ને પણ તમારો તડકો લાગવા માડે છે. જો કે તાઈવાનનાં લોકો એ વિડીયો બનાવી ને આપણા ભાવી ઉપ મુખ્યમંત્રી ની મશરૂમવાળી વાત ને રદિયો આપ્યો છે.
પણ અમને પાકો ભરોસો તેમજ ખાતરી છે કે આપણા ભાવી ઉપમુખ્યમંત્રી જે કહેતા હશે એ સાચું જ કહેતા હશે અને ભવિષ્યમાં લોકો પોતાના બીટકોઈન વેચી વેચીને એના રૂપિયાથી પણ આવા ગોરા થવાના મશરૂમ ની ખેતી કરતા થઇ જશે! આખી દુનિયામાં બધા જ વ્યક્તિઓ ગોરા થઇ ગયા હોવાથી દુનિયામાંથી રંગભેદની સમસ્યા દુર થઇ જશે આખી દુનિયા માં શાંતિ સ્થપાઈ જશે ડોનાલ્ડ ટ્રમ્પ અને બરાક ઓબામા બંને એક જ કલર નાં થઇ જશે. પરંતુ ભવિષ્યમાં વૈજ્ઞાનિકો વધારે સંશોધન કરશે અને જો મશરૂમમાં પણ શેડ આવશે તો સ્ત્રીઓ ને તકલીફ રહેશે કે તેમણે દુધિયા વ્હાઈટ થવું છે કે નોર્મલ વ્હાઈટ? ટુકમાં આ મશરૂમ થી ગોરા થવાનો એક યુનિક આઈડીયા છે જે વેચવાથી રાજ્યનાં દરેક ખેડૂતનું દેવું પણ માફ કરી શકાય એવું છે તો આવો આપણે પણ ત્વચાનાં કાળા રંગનું વિસર્જન કરીએ અને ગોરા રંગનું નવસર્જન કરીએ અને ગર્વ થી કહીએ કે, “મશરૂમ આવે છે ગોરો કલર લાવે છે.”
લી – વ્યવસ્થિત લઘર વઘર અમદાવાદી.
eછાપું
