જ્યારે સ્ત્રીઓ કરે છે પ્રશ્નો રૂપી “બોલીંગ”

3
5
Photo Courtesy: enkirelations.com

આપણેત્યાં માર્ચ મહિનામાં IPL રમાય છે. આ વર્ષનો એવો સમય હોય છે જ્યારે મોટા ભાગના લોકો એવું માનતા હોય છે કે સ્ત્રીઓ ને ક્રિકેટ જોવાનો કોઈ શોખ હોતો નથી, સ્ત્રીઓ વધારે ટી.વી સિરિયલ જ જોવે છે. પણ એવું નથી સ્ત્રીઓ જેટલું સારું ક્રિકેટમાંથી શીખે છે એટલું પુરૂષો પણ શીખી શકતા નથી. સ્ત્રીઓની વાતો, એક-એક પ્રશ્નો તમને ક્રિકેટમાંથી પ્રેરાયેલા હોય એવું ચોક્કસ લાગશે. હું તમને આજે એ બતાવીશ અને સાબિત પણ કરી આપીશ  કે સ્ત્રીઓની આવી પ્રશ્નરૂપી બોલીગ કેવી રીતે ફેસ કરવી.

Photo Courtesy: enkirelations.com

મોટા ભાગની સ્ત્રીઓ વિરાટ કોહલી જેવી હોય છે એ ટાર્ગેટ ચેઝ કરવામાં માને છે એટલે હંમેશા પહેલા પુરૂષ ને બોલવા દે છે અને જેવી પુરૂષની વાત પૂરી થાય એવી તરતજ ફટકાબાજી શરુ કરીને તમારો મુકેલો ટાર્ગેટ અચીવ કરી લે છે. જો તમને સ્ત્રીઓની પ્રશ્નરૂપી બોલીગનું ગુઢ રહસ્ય ખબર હશે તો જ તમે સ્ત્રીઓ સામે સારું ડીફેન્સ કરી શકશો. વળી આ પણ એક ગુઢ રહસ્ય છે જેને આ બોલીગ રમતા આવડે એજ જીંદગીરૂપી ક્રીકેટમાં સારો ખેલાડી બની શકે છે.

તો જોઈએ સ્ત્રીઓની પ્રશ્નો રૂપી “બોલીંગ” ને કેવીરીતે ફેસ કરવી.

સ્ત્રીઓની પ્રશ્નોરૂપી બોલીગના પ્રકાર

સ્લોઅર વન

સાંભળો છો? અથવા તો ફલાણા/ફલાણીના પપ્પા સાભળો છો? (પ્રેમપૂર્વક)

આ પ્રશ્નએ ફાસ્ટ બોલિંગમાં જેમ કોઈ ફાસ્ટ બોલર 140/150 કિલોમીટરની જગ્યાએ અચાનકજ 90/100 કિલોમીટરની ગતિએ જેમ ”સ્લોઅર વન” નાખી દેતો હોય છે એ પ્રકારનો છે. આ પ્રશ્નના જવાબમાં પુરુષોએ કોઇ દીવસ એગ્રેસીવ થઇને જોરથી બેટ ગુમાવીને બોલવુ નહી ”હા હા બોલ બોલ” એવું ઉતાવળમાં આવી જઈને તો જરાય કહેતા નહીં, નહી તો તમે કેચ આઉટ થઇ શકો છો. આમાં સ્ત્રી રૂપી બોલર એકદમ ઝડપી ગતિ થી આવી અને એક દમ ધીમેથી શબ્દો છૂટા મૂકી દે છે. આ બોલિંગમાં ભલભલા ક્રિકેટર એટલેકે પુરુષો થાપ ખાઈ જાય છે અને ક્લીન બોલ્ડ થઇ જાય છે.

બાઉન્સર

“મને એવું લાગે છે કે તમને મારી વાત સાંભળવામા ઇનટરેસ્ટ લાગતો નથી”  (થોડાક ગુસ્સાથી)

આ પ્રશ્ન એ ફાસ્ટ બોલિંગમાં “બાઉન્સર” જેવો હોય છે. આ પ્રશ્નના જવાબમાં ક્રીઝ ઉપર શાંતીથી ઉભા રેહવામાં સમજદારી છે. જો નસીબ સારા હશે તો આ બાઉન્સર તમારા માથા પરથી તમને કોઇપણ હાની પહોંચાડ્યા વગર જતો રહેશે અને એવું પણ બને કે કદાચ અમ્પાયર જે પોતે બોલર પણ છે એ તમને “વન ફોર ધી ઓવર” આપીને મુક્ત પણ કરી દે. પણ જો તમે આ બોલમાં વધારે ડાહ્યા થયા અને વિકેટકિપરની ઉપરથી ફ્લીપ કટ મારવાની કોશિશ કરી કે પછી હુક કે પુલ કરવાની કોશિશ કરી તો તમને જરાય આઈડિયા નહીં હોય એટલાબધા વિકેટકિપરો અને સ્લીપમાં પણ ફિલ્ડરો ગોઠવેલા હશે કે તમારું આઉટ થવું પાક્કું જ થઇ જશે

“બીમર”

ક્રિકેટમાં બેટ્સમેનની કમરની ઉપર ડાયરેક્ટ નાખવામાં આવેલા ફૂલટોસ બોલને બીમર કેહવાય છે.

“કોનો ફોન હતો ?” “આજકાલ મારો ફોન કેમ નથી ઉપાડતા?” “ક્યાં ગયા હતા?”  (થોડાક ગુસ્સા પુર્વક)

આ પ્રશ્ન બોલીગના “બીમર” એટલે કે વેસ્ટ ઉપરના ફુલટોસ જેવો હોય છે જેને તમને નો-બોલ આપવાની ઇચ્છા હોય તો પણ આપી શકતા નથી. આવી બોલીગ વખતે ફક્ત ક્રીઝ ઉપર ઉભા રેહવાનું અને લાંબી ઇનીગ રમવાની છે એજ વિચારો કરવા અથવા તો ચુપચાપ પ્લેડ કરીને બોલ રમી નાખવો.

“ગુગલી”

“આજે આપણે ક્યાંક બહાર જઈએ તો?  (એકદમ પ્રેમપૂર્વક)

શાસ્ત્રોમાં આ પ્રશ્ન લેગસ્પિનરના ઘાતક શસ્ત્ર “ગુગલી” સ્વરૂપનો કહેવામાં આવ્યો છે. ભલભલો પ્લેયર આ પ્રશ્ન  નો-બોલમાં ફ્રી હીટની જેમ રમી નાખતો હોય છે અને વિકેટ ખોઇ નાખતો હોય છે. કોઈ દિવસ આ ગુગલી બોલની સામે બીજો પ્રશ્નનાં પૂછવો કે ‘’કેમ આજે કામવાળા ભઈ કે બાઈ નથી આયા?” નહીંતો આવા ગુગલી બોલ તમારી વિકેટ ખેરવી શકે છે .

“યોર્કર”

”હું કેવી લાગુ છું? ”  (એકદમ પ્રેમપૂર્વક)

સ્ત્રીઓ દ્વારા પૂછવામાં આવેલો આ પ્રશ્ન વકાર યુનીસના “યોર્કર” કરતાં પણ ઘાતક હોય છે. કોઇ દીવસ આ પ્રશ્નને ફ્રંટ ફુટ પર આવીને રમવો નહી, નહી તો ક્લીન બોલ્ડ થશો અથવા લેગ બીફોર ધી વિકેટ થવાના ચાન્સીસ  છે અને એય તમારો અંગૂઠો ભાંગી ગયા બાદ! આથી આ પ્રશ્નને મજબૂતીથી પ્લેડ કરવામાં જ સમજદારી છે.

આમતો ઉપર જણાવવામાં આવેલા સ્ત્રીઓની બોલિંગના પ્રકારો અને તેને રમવાની ટેકનીક ને એબધું જનજાગ્રતી લાવવાના આશયથી લખવામા આવ્યુ છે. જો ટ્રાય કરવાથી કોઈ નુકશાન થાય તો અમને કેહવું નહીં કેમકે હજુ લેખક પણ સ્ત્રીઓની પ્રશ્નો રૂપી બોલિંગ સમજવામાં “કાચીપુડી” છે.

લિ. વ્યવસ્થિત લઘર વઘર અમદાવાદી.

 

eછાપું

3 COMMENTS

  1. ચોપડી લખો… આપના જેવા સંસાર પુરાણ ના કથાકાર ની ખાસ જરૂર છે… આ ઓવરો ની પેટર્ન સમજનાર પતિદેવો ના કોચિંગ રાખો… વીથ પ્રેક્ટીકલ

LEAVE A REPLY

Please enter your comment!
Please enter your name here